கல்விக் கடன் பெறுவதற்கான தகுதி என்னென்ன?

நர்சரி படிப்பு முதல், ஒவ்வொரு வகுப்பிக்கான கல்விக்கட்டணம் நாளுக்கு நாள் உயர்ந்து வருகிறது. கல்லூரி படிப்புக்கும், உயர்கல்விக்கும், பல மாணவர்கள் மருத்துவம், பொறியியல் போன்ற படிப்புகளில் சேருவதற்கும், வெளிநாடுகளில் உயர்கல்வி பெறுவதற்குமான கட்டணங்கள் விண்ணைத் தொடும் அளவுக்கு தற்போது இருக்கின்றன. ஆனாலும், விரும்பிய படிப்பைப் படிப்பதற்கு, பல வங்கிகளும் கல்விக் கடன் வழியே நிதி வசதியை அளிக்கின்றது. பல வங்கிகள் மற்றும் நிதி நிறுவனங்கள் அனைத்து வகையான கல்வி படிப்புகளுக்கும் கடன் வழங்குகின்றன.

இது உள்நாட்டு கல்விக்கும் மற்றும் வெளிநாட்டு படிப்பிற்கும் பொருந்தும். கல்விக் கடனின் முக்கிய நோக்கம், பணப் பற்றாக்குறையால் படிக்க ஆசைப்படும் மாணவர்களின், நன்றாகப் படிக்கும் மாணவர்களின் கல்வி தடைபடக் கூடாது என்பதாகும். எளிதாகக் கிடைப்பது, குறைந்த வட்டி விகிதங்கள், கல்வியை முடித்த பிறகு திருப்பிச் செலுத்துதல், கடன் தவணைகளை நீண்ட திருப்பிச் செலுத்தும் காலம் போன்றவற்றால் கல்விக் கடனைப் பெறுவது சுமையாகவே இல்லை. பெற்றோர்களும் தங்கள் குழந்தைகளின் நல்ல எதிர்காலத்திற்காக கல்விக் கடன் வாங்க விரும்புகிறார்கள். இந்தக் கடனைத் திருப்பிச் செலுத்தும் முக்கியப் பொறுப்பு மாணவர்களிடம் உள்ளது.

நம் நாட்டில் கல்வியின் வளர்ச்சி காரணமாக, அதிக எண்ணிக்கையிலான மாணவர்கள் தற்போது உயர்கல்வி பெற விரும்புகின்றனர். வெளிநாடுகளுக்குச் சென்று, கல்வி நிறுவனங்களில் சேர்க்கை பெறுவது எளிதாகிவிட்டதால், மேற்படிப்புக்காக வெளிநாடு செல்லும் மாணவர்களின் எண்ணிக்கை லட்சங்களை எட்டியுள்ளது. இதனால், கடந்த சில ஆண்டுகளாக நாட்டில் கல்விக் கடனுக்கான தேவையும் கணிசமாக அதிகரித்துள்ளது. இப்போதெல்லாம் பெரும்பாலான பொதுத்துறை மற்றும் தனியார் வங்கிகள், நிதி நிறுவனங்கள் கல்விக் கடன்களை வழங்குகின்றன. ஆனால், கல்விக் கடன் வாங்குவதற்கு சில தகுதிகள் உள்ளன.

நர்சரி முதல் முதுகலை மற்றும் உயர்கல்வி வரை கடன் வழங்கப்படுகிறது. இந்தக் கடனைப் பெற விரும்பும் மாணவர்கள் வங்கிகள் மற்றும் நிதி நிறுவனங்களின் சில தகுதிகளை பூர்த்தி செய்ய வேண்டும். பொதுவாக, இந்த அளவுகோல்கள் எல்லா இடங்களிலும் ஒரே மாதிரியானவை; ஆனால் சில வங்கிகள் மற்றும் நிதி நிறுவனங்கள் வெவ்வேறு அளவுகோல்களைக் கொண்டிருக்கலாம். கடனுக்கு விண்ணப்பிப்பதற்கு முன், நீங்கள் தகுதி பெறுவதற்கான நிபந்தனைகள் மற்றும் விதிமுறைகளை அறிந்து கொள்ள வேண்டும்.

கல்விக் கடன்களின் வகைகள் :

உள்நாட்டுக் கல்விக் கடன்: இந்தியாவில் படிக்க விரும்பும் மாணவர்கள் இந்தக் கடனுக்கு விண்ணப்பிக்கலாம். இந்தியாவில் உள்ள கல்வி நிறுவனங்களில் சேரும் மாணவர்கள் மட்டுமே இந்தக் கடனைப் பெற முடியும்.

வெளிநாட்டு கல்வி கடன்: வெளிநாட்டில் படிக்க விரும்பும் மாணவர்களின் கனவை நனவாக்க இந்தக் கடன்கள் உதவுகின்றன. வெளிநாட்டில் படிக்க கல்விக் கடன் வாங்க விரும்பும் மாணவர்களுக்கான விமான டிக்கெட்டுகள், தங்குமிடம் மற்றும் கல்விக் கட்டணம் ஆகிய அனைத்து செலவுகளுமே கடனில் அடங்கும்.

இளங்கலை கடன்: கல்லூரியில் இளங்கலைப் படிப்பு படிக்க விரும்பும் மாணவர்களுக்கு நிதியுதவி வழங்குவதற்காக இந்த வகை கல்விக்கடன் வழங்கப்படுகிறது.

முதுகலை கடன்: பல இளங்கலை பட்டதாரிகள் முதுகலைப் படிப்பு வழியே தங்கள் கல்வியைத் தொடர விரும்புகிறார்கள். இளங்கலை படிப்பை முடித்த பட்டதாரிகளுக்கு இந்த கடன் வழங்கப்படும்.

தொழில் வளர்ச்சி கடன்: பலர் தாங்கள் செய்யும் வேலையை சிறிது காலத்திற்கு விட்டுவிட்டு தொழில்முறை படிப்புகள் மற்றும் பயிற்சிகளை எடுக்க விரும்புகிறார்கள். அவ்வாறு செய்வது அவர்களின் தகுதியை உயர்த்துகிறது. அத்தகைய சூழ்நிலையில் அவர்கள் தொழில் வளர்ச்சிக்கான கடனைத் தேர்வு செய்யலாம்.

கல்விக் கடனுக்கு வரிச் சலுகை உள்ளதா?

வருமான வரிச் சட்டம், 1961 இன் பிரிவு 80E இன் கீழ், உங்கள் கல்விக் கடனுக்கான வட்டிக்கு வரி விலக்கு கிடைக்கும். உயர்கல்வியின் நோக்கம் நிறைவேறுவதற்காக, இந்த நன்மை வழங்கப்படுகிறது. இந்த விலக்கு, இந்தியா, வெளிநாட்டு படிப்பு என்று அனைத்து விதமான கல்விக் கடனுக்கும் பொருந்தும்.

குறிப்பிடத்தக்க வகையில், வரி விலக்கு கல்விக் கடனின் EMI இன் வட்டிப் பகுதிக்கு மட்டுமே பொருந்தும், அசல் தொகைக்கு அல்ல. இந்த நன்மையைப் பெற அதிகபட்ச வரம்பு எதுவும் இல்லை. வரி விலக்கைப் பெற, உங்கள் EMI இன் அசல் மற்றும் வட்டியைப் பற்றிய அறிக்கையை, உங்கள் வங்கி அல்லது நிதி நிறுவனத்திடமிருந்து பெற வேண்டும்.

கல்விக் கடன் பெறுவதன் நன்மைகள் :

• ரூ.1 கோடி வரை கடன் பெறலாம்.
• கடன் திருப்பிச் செலுத்தும் காலம் 15 ஆண்டுகள் வரை அனுமதிக்கப்பட்டுள்ளது
• சில நிறுவனங்கள் வெளிநாட்டு கல்விக் கடனுக்கு விசாவிற்கு விண்ணப்பிப்பதற்கு முன்பே கடன்களை வழங்குகின்றன.
• சில வங்கிகளில் ஊழியர்களின் குழந்தைகளுக்கு குறைந்த வட்டியில் கல்விக்கடன் வழங்கப்படுகிறது.
• படிப்பு முடிந்து ஓராண்டுக்கு தவணை செலுத்துவதில் நிவாரணம் உண்டு.

கல்விக் கடன் பெறுவதற்கான தகுதி என்ன :

வீட்டுக் கடன் அல்லது கார் கடன் போன்ற கல்விக் கடனைப் பெறுவதற்கு சில நிபந்தனைகள் பின்பற்றப்பட வேண்டும். கல்விக் கடன் வழங்குவதில், வங்கிகள் தங்கள் வாடிக்கையாளர்களுக்கு வெவ்வேறு தரநிலைகளை அமைத்துள்ளன.

1) மாணவர் இந்திய குடிமகனாக இருக்க வேண்டும்.

2) இந்தியாவிலோ அல்லது வெளிநாட்டிலோ அங்கீகரிக்கப்பட்ட பல்கலைக் கழகத்தில் சேருவது, மாணவரின் தகுதி அல்லது நுழைவுத் தேர்வின் அடிப்படையில் முடிவு செய்யப்பட வேண்டும்.

4) தொழில் சார்ந்த படிப்பில் மாணவர் சேர்க்கை பெற வேண்டும். (சில வங்கியில் இந்த விதிமுறை மாறும்.)

5) மாணவர் தேர்வில் 50% மதிப்பெண்களுக்கு மேல் பெற்று தேர்ச்சி பெற்றிருக்க வேண்டும்.

6) இளங்கலை திட்டம், முதுகலை திட்டம், முனைவர் படிப்புகள் மற்றும் பிஎச்டிகளுக்கு கல்விக் கடன்கள் கிடைக்கும்.

பிணையம் தேவைப்படும் கல்விக் கடனுக்கான அளவுகோல்கள் :

விவசாய நிலம், வீட்டு மனை, பிளாட், வீடு, நிலையான வைப்புநிதி சான்றிதழ், ரெக்கரிங் டெப்பாசிட், தங்க வைப்பு, பத்திரங்கள், கடன் பத்திரங்கள் மற்றும் ஈக்விட்டி பங்குகள் போன்ற சொத்துக்களை அடமானம் வைத்து பிணையம் தேவைப்படும் கல்விக் கடன் பெறலாம்.

பிணையம் தேவைப்படும் கல்விக் கடனில், மாணவர் கடன் தொகைக்கு எதிராக பிணையத்தை வைக்க வேண்டும். அதாவது, ஏதாவது அடமானம் வைக்க வேண்டும். பிணையத்தின் அடிப்படையில் கடன் தொகை தீர்மானிக்கப்படுகிறது. பொதுவாக, இந்த வகையான கல்விக் கடனில், பிணையில் வைக்கப்படும் பொருளின் மதிப்பு கடன் தொகையை விட அதிகமாக இருக்க வேண்டும். கூடுதலாக, பிணையம் வைப்பதற்கான ஆவணம் அசலாக இருக்க வேண்டும்.

பிணையமற்ற கல்விக் கடனுக்கான அளவுகோல்கள் :

இந்த வகை கல்விக் கடனில் எதையும் பிணையம் வைக்க வேண்டிய அவசியமில்லை. இந்தக் கடனுக்கு விண்ணப்பிக்கும் மாணவர், பணம் சம்பாதிக்கும் உறவினரை இணை விண்ணப்பதாரராக உருவாக்க வேண்டும். கடன் தொகை, மாணவரின் கல்வி விவரம், எதிர்காலத்தில் அவர் எவ்வளவு சம்பாதிக்க முடியும் என்ற மதிப்பீடுகள், பாடத் தரவரிசை மற்றும் இணை விண்ணப்பதாரரின் வருமானம் ஆகியவற்றைக் கணக்கில் எடுத்துக்கொள்கிறது.